JAHRI
Jahri saurang lalakian tuha dikampung Sungai Damang. Inya bausaha batukar buah nyiur. Salain batukar buah nyiur, inya batukar jua sagala rarapunan. Nang kaya rapun nyiur, rapun binjai, rapun katapi, rapun durian, rapun rambai, rapun sawu, rapun asam, asal nang ganal ha batangnya. Amun batang gumbili atawa batang pisang kada hakun inya manukari.
Jahri tu bila takana rajin, rajin banar bausaha. Bila takana kuler, hakun saharian tu pang kada takitar pada paguringan.
Bila musim hujan, rami iwak dipahumaan, inya mambanjur, mamasang lukah, lawan maringgi di pahumaan. Tapi maunjun kada bisa.
Jahri tu balum babini, inya bujang lapuk. Napa kaha maka balum babini? Padahal inya baduit banar, bus rapun lawan bus nyiur.
Parnah inya suatu hari saruan kapangantin kawannya di kampung subarang. Malihat ada binian bungas banar. Ngaran biniannya ti Sari, orangnya sintal, muha kaya Julia Piris, saraba kancang awak. Lalu ai Jahri niti jatuh cinta, rusak banar hati lawan Sari. Baminggu-minggu maudaki Sari, tapi Sari jual mahal. Kisah kada tapi paduli lawan inya. Karna jahri tu tuha, awak kurus banar, muha tapinya mirip Jamis Bun pang.
Subuh arba, Jahri tulak kapasar subuh bamutur pikap mambawa nyiur gasan bajual. Sakalinya di pasar Jahri malihat Sari. Nang ngaran hati rusak lawan Sari, balaluai baparak handak mamandiri Sari, sambil manapuk kabahu.
“Ding, napa dicari kapasar subuh?” ujar Jahri mamandiri.
Asa takijat-kijat ai Sari nih, ditapuk mulai balakang. Hari masih pina kadap, jadi kada pinandu.
“Siapa pian?” sasahutan Sari.
“Umai pian kada pinandu lawan ulun lah? Ulun Jahri ding ai.”
“Iiih kaka Jahri ah? Kada pinandu ulun niti.”
“Maapa pian kapasar ding?”
“Batutukar wadai ka ai”
“Bawarung ah pian ding?”
“Inggih kaka ai.”
Pina rasuk sudah pandir, betakun ai pulang jahri.
“Lawan siapa pian ding?”
“Saurangan haja.” Ujar Sari
“Digani’i ah batutukar?”
“Kada gin, kaina mangalihakan pian.”
Pandir rasuk. Lalu jahri mangaluarkan jurus-jurus manjurus gasan marayu sari, tatakunan kaya pulisi malayau.
“Ading bungas, siapa ampunnya?”
“Hmmm napang tih jadi batakun ampun siapa? Nyata ai ampun mama lawan abah ulun.” Ujar Sari manyahuti.
“Ding, pian niti ada sudah beisi kawan lah?”
“Kawan apa ka?” disahuti Sari.
“Kawan guring dingai,” hihi sambil lihum Jahri.
“Ada ai ka ai,” ujar Sari.
Uma Jahri langsung asa lamah lintuhut mandangar.
“Gaguling ka Jahri ai kawan ulun,” ujar Sari pulang manambahi.
Asa himung pulang Jahri, dikira Jahri belaki si Sari niti,
Kada lawas ditinggalakan Sari bajauh Jahri. Imbah bajauh laluai bulik Jahri karumah, dirumah Jahri bapikir kaya apa caranya supaya kawa mandapat akan Sari. Handak bapadah lawan kuitan asa supanan. Imbah itu batakun Jahri lawan si Agaw kawan sakaligus tatangga subalah rumah.
“Ikam tahu lah lawan Sari urang kampung subarang?” ujar Jahri.
“Tahu ai aku,” ujar Agaw manyahuti.
“Aku rusak banar lawan Sari. Asa tabayang-bayang muha Sari tarus tiap malam.”
“Naaah kaitu ah ti, sintal banar Sari tu. Tapi balu inya, kada baanak pang, ikam mun handak maudaki Sari tu uluri duit haja, inya pasti hakun Jahri ai.”
“Bujuran ah Gaw balu?”
“Hi’ih balu Jahri ai.”
“Biar ha balu, nang ngaran hati rusak niti lawan Sari kada kawa ditatahani.
Ayuha kaina kamarian neh handak kutamui am.”
Kamarian jam 5 an, Jahri tulak basapida mutur puswan nang knalput mamparapap nyaring, ampah ka kampung subarang. Kujuk-kujuk sambil balarut basapida mutur, cangang kiri kanan, kalu pina talalui warungnya Sari.
“Mana yu lih warungnya Sari,” baucap Jahri dalam hati.
Pas taka subalah masijid sadikit sakalinya ada warung, kabatulan nang jaga Sari saurangan di warung, singgahai Jahri di warung Sari. Bapandiran ai.
“Ding, kaka kangen lawan pian dingai.”
“Kangen bin kah?”
“Nah, ading neh mahuhulut kaka.”
“Hihi, handak minum apa pian nah?”
“Barang haja dingai apa nang ada?”
“Jangan babarang haja, ada pina ulun surungi banyu kubukan.”
“Hihi, ading nih lucu jua, minum tih dingin haja mun kaitu nah.”
Sambil minum diwarung tutih sambil berayuan Jahri lawan Sari, saban hari tu pang Jahri kawarung Sari bila kamarian. Karna Jahri saing banar handak mandapatkan cintanya Sari.
Paampihannya Sari jatuh hati, hakun lawan Jahri. Bapacaran 3 bulan langsung diambil bini oleh jahri.
Tidak ada komentar:
Posting Komentar